ಕೇರಳದ ವಯನಾಡು ಜಿಲ್ಲೆಯಲ್ಲಿ ಉಂಟಾಗಿರುವ ಭೂಕುಸಿತಕ್ಕೆ ತಾಪಮಾನವೇ ಪ್ರಮುಖ ಕಾರಣ ಎಂಬ ಅಂಶ ಬಯಲಾಗಿದೆ!

“ಅರಬ್ಬೀ ಸಮುದ್ರದ ತಾಪಮಾನದಿಂದ ದಟ್ಟವಾದ ಮೋಡಗಳು ನಿರ್ಮಾಣಗೊಂಡು ಅಲ್ಪಾವಧಿಯಲ್ಲಿಯೇ ಭಾರಿ ಮಳೆಯಾಗಲು ಕಾರಣವಾಯಿತು” ಎಂದು ಋತುಮಾನಗಳ ಕುರಿತು ಅಧ್ಯಯನ ನಡೆಸುತ್ತಿರುವ ಹಿರಿಯ ವಿಜ್ಞಾನಿ ಅಭಿಲೇಶ್ ತಿಳಿಸಿದ್ದಾರೆ.

ಈ ಕುರಿತು ಮಾತನಾಡಿರುವ ಕೊಚ್ಚಿಯ ವಿಜ್ಞಾನ ಮತ್ತು ತಂತ್ರಜ್ಞಾನ ವಿಶ್ವವಿದ್ಯಾಲಯದ ವಾಯುಮಂಡಲದ ರಾಡಾರ್ ಸಂಶೋಧನಾ ಕೇಂದ್ರದ ನಿರ್ದೇಶಕ ಅಭಿಲೇಶ್, “ಇಡೀ ಕೊಂಕಣ ಪ್ರದೇಶದಲ್ಲಿ ಕಳೆದ ಎರಡು ವಾರಗಳಿಂದ ಮುಂಗಾರು ಮಳೆ ಚುರುಕುಗೊಂಡಿರುವುದೇ ಭೂಕುಸಿತಕ್ಕೆ ಕಾರಣ.

ಈ ಕಾರಣದಿಂದಾಗಿ ಕಾಸರಗೋಡು, ಕಣ್ಣೂರು, ವಯನಾಡು, ಕೋಳಿಕ್ಕೋಡ್ ಮತ್ತು ಮಲಪ್ಪುರಂ ಜಿಲ್ಲೆಗಳಲ್ಲಿ ಭಾರೀ ಮಳೆಯಾಗಿದೆ.

ಎರಡು ವಾರಗಳಿಂದ ಬೀಳುತ್ತಿರುವ ಮಳೆಯಿಂದಾಗಿ ಮಣ್ಣು ತುಂಬಾ ತೇವವಾಗಿತ್ತು. ಈ ಹಿನ್ನೆಲೆಯಲ್ಲಿ, ಅತಿಯಾದ ಕಪ್ಪು ಮೋಡಗಳು ಅರೇಬ್ಬೀ ಸಮುದ್ರದ ಕರಾವಳಿ ಪ್ರದೇಶಗಳಲ್ಲಿ ಸುತ್ತುವರಿದು, ಭಾರೀ ಮಳೆಯಾದ ಕಾರಣ, ಸಡಿಲವಾದ ಮಣ್ಣು ದುರ್ಬಲಗೊಂಡು ಭೂಕುಸಿತ ಸಂಭವಿಸಿದೆ.

ಅಂದರೆ, 2019 ರಲ್ಲಿ ಕೇರಳದಲ್ಲಿ ಪ್ರವಾಹ ಬಂದಾಗ ಮೋಡಗಳು ಎಷ್ಟು ದಟ್ಟವಾಗಿತ್ತೋ ಅದೇ ಮಟ್ಟಿಗೆ ಈಗಲೂ ಮೋಡಗಳು ದಟ್ಟವಾಗಿ ಸುತ್ತುವರಿದಿದೆ. ಇದಲ್ಲದೆ, ಆಗ್ನೇಯ ಅರಬ್ಬೀ ಸಮುದ್ರದ ಪ್ರದೇಶದಲ್ಲಿ ಏರಿಕೆಯಾಗುತ್ತಿರುವ ತಾಪಮಾನದಿಂದ ಅಲ್ಲೊಂದು ವಾಯುಮಂಡಲ ನಿರ್ಮಾಣವಾಗಿತ್ತು. ಇದಕ್ಕೂ ಹವಾಮಾನದ ತಾಪಮಾನಕ್ಕೂ ಸಂಬಂಧ ಇದೆ” ಎಂದು ಹೇಳಿದ್ದಾರೆ.