Allu Arjun: ಪುಷ್ಪ-3 ಬರುತ್ತಾ?- ಇದು ಅಲ್ಲು ಅರ್ಜುನ್ ನೀಡಿದ ಅಪ್‌ಡೇಟ್!
‘ಮೊದಲ ಭಾಗಕ್ಕಿಂತ ಪುಷ್ಪ ಎರಡನೇ ಭಾಗ ವಿಭಿನ್ನವಾಗಿರಲಿದೆ’- ಅಲ್ಲು ಅರ್ಜುನ್
ಸುಕುಮಾರ್ ನಿರ್ದೇಶನದಲ್ಲಿ 2021ರಲ್ಲಿ ತೆರೆಕಂಡ ಯಶಸ್ವಿ ಚಲನಚಿತ್ರ ಪುಷ್ಪ. ಅಲ್ಲು ಅರ್ಜುನ್ ಮತ್ತು ರಶ್ಮಿಕಾ ಮಂದಣ್ಣ ನಟಿಸಿದ್ದಾರೆ. ಫಹದ್ ಫಾಸಿಲ್ ಮುಂತಾದವರು ಕೂಡ ಚಿತ್ರದಲ್ಲಿ ನಟಿಸಿದ್ದಾರೆ. ದೇವಿ ಶ್ರೀ ಪ್ರಸಾದ್ ಸಂಗೀತ ಸಂಯೋಜಿಸಿದ್ದರು.
ಚಿತ್ರ ಬಿಡುಗಡೆಯಾಗಿ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದು ಕಲೆಕ್ಷನ್ ನಲ್ಲಿ ದಾಖಲೆ ನಿರ್ಮಿಸಿತು. ಈ ಚಿತ್ರದ ನಟನೆಗಾಗಿ ಅಲ್ಲು ಅರ್ಜುನ್‌ಗೆ ರಾಷ್ಟ್ರ ಪ್ರಶಸ್ತಿ ಕೂಡ ಲಭಿಸಿತು. ಇದರ ಬೆನ್ನಲ್ಲೇ ಸದ್ಯ ಪುಷ್ಪ ಎರಡನೇ ಭಾಗ ನಿರ್ಮಾಣವಾಗುತ್ತಿದೆ. ಆಗಸ್ಟ್ 15 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ ಎಂದು ಈಗಾಗಲೇ ಘೋಷಿಸಲಾಗಿದೆ. ಈ ಹಿನ್ನಲೆಯಲ್ಲಿ, ಬರ್ಲಿನ್ ಫಿಲ್ಮ್ ಫೆಸ್ಟಿವಲ್ ನಲ್ಲಿ ‘ಪುಷ್ಬ’ ಸಿನಿಮಾ ಪ್ರದರ್ಶನಕ್ಕೆ ಬರ್ಲಿನ್ ಗೆ ತೆರಳಿದ್ದ ಅಲ್ಲು ಅರ್ಜುನ್ ಚಿತ್ರದ ಮೂರನೇ ಭಾಗದ ಬಗ್ಗೆ ಮಾತನಾಡಿದ್ದಾರೆ.
ಈ ಕುರಿತು ಮಾತನಾಡಿದ ಅವರು, “ಖಂಡಿತವಾಗಿ ನೀವೆಲ್ಲರೂ ಪುಷ್ಪ ಮೂರನೇ ಭಾಗವನ್ನು ನಿರೀಕ್ಷಿಸಬಹುದು. ನಮ್ಮಲ್ಲಿ ಉತ್ತಮವಾದ ವಿಚಾರಗಳಿವೆ. ಪುಷ್ಪ ಎರಡನೇ ಭಾಗವು ಮೊದಲ ಭಾಗಕ್ಕಿಂತ ಭಿನ್ನವಾಗಿರಲಿದೆ. ಕಾರಣ, ಸ್ಥಳೀಯವಾಗಿದ್ದ ಕಥಾಹಂದರ, ಭಾರತದಲ್ಲಿಯೂ,ಅಂತಾರಾಷ್ಟ್ರೀಯ ಮಟ್ಟದಲ್ಲಿಯೂ ವಿಸ್ತಾರಗೊಂಡಿದೆ.
ಪುಷ್ಪಾ ಮೊದಲ ಭಾಗದಲ್ಲಿ ಪೊಲೀಸ್ ಅಧಿಕಾರಿ ಬನ್ವರ್ ಸಿಂಗ್ ಶೇಖಾವತ್ ಪಾತ್ರ ನಿರ್ವಹಿಸಿದ್ದ ಫಹದ್ ಫಾಸಿಲ್ ಈ ಭಾಗದಲ್ಲಿ ಪುಷ್ಪಾಗೆ ದೊಡ್ಡ ಸವಾಲಾಗಲಿದ್ದಾರೆ. ಇಬ್ಬರ ನಡುವಿನ ಸಂಘರ್ಷ ದೊಡ್ಡದಾಗಿರುತ್ತದೆ” ಎಂದು ಹೇಳಿದ್ದಾರೆ. ಪುಷ್ಪ ಚಿತ್ರದ ಮುಂದಿನ ಭಾಗಗಳಿಗಾಗಿ ಕಾಯುತ್ತಿರುವ ಅಭಿಮಾನಿಗಳಿಗೆ ಅವರ ಈ ಘೋಷಣೆ ಉತ್ಸಾಹವನ್ನು ತಂದಿದೆ.
