ಇಸ್ಲಾಂಗೆ ಮತಾಂತರಗೊಂಡವರಿಗೆ ‘ಬಿಸಿ’ ಜಾತಿ ಪ್ರಮಾತ್ರ ಪತ್ರ: ತಮಿಳುನಾಡು ಸರ್ಕಾರದಿಂದ ಸುಗ್ರೀವಾಜ್ಞೆ!
ಚೆನ್ನೈ: ಇಸ್ಲಾಂಗೆ ಮತಾಂತರಗೊಳ್ಳುವ ಹಿಂದುಳಿದ, ಅತಿ ಹಿಂದುಳಿದ, ಆದಿ ದ್ರಾವಿಡ (ಎಸ್.ಸಿ/ಎಸ್.ಟಿ) ಜನಾಂಗದವರಿಗೆ ಮುಸ್ಲಿಂ ಹಿಂದುಳಿದ ವರ್ಗಗಳೆಂದು (ಎಂಬಿಸಿ) ಜಾತಿ ಪ್ರಮಾಣ ಪತ್ರ ನೀಡಲು ತಮಿಳುನಾಡು ಸರ್ಕಾರ ಸುಗ್ರೀವಾಜ್ಞೆ ಹೊರಡಿಸಿದೆ.
ತಮಿಳುನಾಡಿನಲ್ಲಿ, 2012 ರವರೆಗೆ, ಇತರ ಧರ್ಮಗಳಿಂದ, ಹಿಂದುಳಿದ, ಅತಿ ಹಿಂದುಳಿದ, ಆದಿ ದ್ರಾವಿಡ ವರ್ಗಗಳಿಗೆ ಸೇರಿದವರು, ಇಸ್ಲಾಂಗೆ ಮತಾಂತರಗೊಂಡರೆ, ಅವರು ಈ ಹಿಂದೆ ಪಡೆದಿದ್ದ ಜಾತಿ ಪ್ರಮಾಣ ಪತ್ರವನ್ನು ಬದಲಾಯಿಸಿ, ಮುಸ್ಲಿಂ ರಾವುತ್ತರ್ ಅಥವಾ ಲಬ್ಬೈ ಎಂದು ಹೊಸದಾಗಿ ಜಾತಿ ಪ್ರಮಾಣ ಪತ್ರ ವಿತರಿಸಲಾಯಿತು.
ಈ ಮೂಲಕ ಅವರನ್ನು ಹಿಂದುಳಿದ ಮುಸ್ಲಿಮರು ಎಂದು ಪರಿಗಣಿಸಿ, ಶಿಕ್ಷಣ ಮತ್ತು ಉದ್ಯೋಗದಲ್ಲಿ ಹಕ್ಕುಗಳನ್ನು ನೀಡಲಾಯಿತು. ಆದರೆ, 2012ರ ನಂತರ ಬಂದ ಸರ್ಕಾರ ಮತಾಂತರಗೊಂಡ ಮುಸ್ಲಿಮರಿಗೆ ಈ ಪ್ರಮಾಣ ಪತ್ರ ನೀಡಲಿಲ್ಲ.
ಹಿಂದಿನಂತೆ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡ ಬಿಸಿ, ಎಂಬಿಸಿ, ಎಸ್.ಸಿ/ಎಸ್.ಟಿ ವರ್ಗಗಳಿಗೆ ಸೇರಿದವರನ್ನು ಹಿಂದುಳಿದ ವರ್ಗದ ಮುಸ್ಲಿಮರು ಎಂದು ಪರಿಗಣಿಸಿ, ಜಾತಿ ಪ್ರಮಾಣ ಪತ್ರ ನೀಡಬೇಕು ಎಂದು ಮುಸ್ಲಿಂ ಸಂಘಟನೆಗಳು ಒತ್ತಾಯಿಸಿದ್ದವು. ಒಪ್ಪಿಕೊಂಡ ಸರ್ಕಾರ ಮೊನ್ನೆ ಸುಗ್ರೀವಾಜ್ಞೆ ಹೊರಡಿಸಿದೆ.
ಅದರಂತೆ, ಜುಲೈ 29, 2008 ರಂದು ಹೊರಡಿಸಲಾದ ಸುಗ್ರೀವಾಜ್ಞೆಯಲ್ಲಿ ಉಲ್ಲೇಖಿಸಿರುವಂತೆ ಏಳು ಮುಸ್ಲಿಂ ಪಂಗಡಗಳಲ್ಲಿ, ಮತಾಂತರಗೊಂಡವರು ಆದ್ಯತೆ ನೀಡುವ ಒಂದು ಪಂಥವನ್ನು ಉಲ್ಲೇಖಿಸಿ, ಹಿಂದುಳಿದ ವರ್ಗದ ಮುಸ್ಲಿಮರೆಂದು ಜಾತಿ ಪ್ರಮಾಣ ಪತ್ರ ನೀಡಲು ಆದೇಶ ಹೊರಡಿಸಲಾಗಿದೆ. ಹೀಗಾಗಿ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡವರಿಗೆ ಶಿಕ್ಷಣ ಮತ್ತು ಉದ್ಯೋಗಾವಕಾಶಗಳಲ್ಲಿ ಶೇ.3.5ರಷ್ಟು ಮೀಸಲಾತಿ ದೊರೆಯುವ ಸಾಧ್ಯತೆ ಇದೆ.
