ಎಲಾನ್ ಮಸ್ಕ್ ಅವರ ನ್ಯೂರಾಲಿಂಕ್ ಸಂಸ್ಥೆಯು ಮಾನವನ ಮೆದುಳಿನಲ್ಲಿ “ಚಿಪ್” ಅನ್ನು ಅಳವಡಿಸಿ, ಅದನ್ನು ಕಂಪ್ಯೂಟರ್‌ಗೆ ಜೋಡಿಸುವ ತಂತ್ರಜ್ಞಾನದ ಮೂಲಕ ನರ ಸಂಬಂಧಿ ಕಾಯಿಲೆಗಳಿಗೆ ವೈದ್ಯಕೀಯ ನೆರವು ನೀಡುವ ಸಂಶೋಧನೆ ನಡೆಸುತ್ತಿದೆ.
ನರರೋಗದಿಂದ ಬಳಲುತ್ತಿರುವವರು, ಪಾರ್ಶ್ವವಾಯು ಮತ್ತು ದೃಷ್ಟಿಹೀನತೆ ಹೊಂದಿದವರು ಸ್ಮಾರ್ಟ್‌ಫೋನ್‌ ಮತ್ತು ಕಂಪ್ಯೂಟರ್‌ಗಳಂತಹ ಸ್ಮಾರ್ಟ್ ಡಿವೈಸ್‌ಗಳನ್ನು ಸುಲಭವಾಗಿ ಬಳಸಬೇಕೆಂಬ ಉದ್ದೇಶದಿಂದ ಅವರ ಮಿದುಳಿಗೆ ಮೈಕ್ರೋಚಿಪ್ ಅಳವಡಿಸುವ ಸಂಶೋಧನೆಯಲ್ಲಿ ತೊಡಗಿದೆ. ಈ ಮೂಲಕ ಕಣ್ಣಿನ ದೃಷ್ಟಿ ಮತ್ತು ಪಾರ್ಶ್ವವಾಯು ಸಮಸ್ಯೆಗಳನ್ನು ಪರಿಹರಿಸಲು ಪ್ರಯತ್ನಿಸುತ್ತಿದೆ.
‘ಮಂಗಗಳ ಮಿದುಳಿಗೆ ‘ಚಿಪ್’ ಅಳವಡಿಸಿ ನಡೆಸಿದ ಬಹು ಹಂತದ ಪ್ರಯೋಗವು ಯಶಸ್ವಿಯಾಗಿದೆ’ ಎಂದು ಪ್ರಕಟಿಸಿದೆ. ಇದರ ಬಗ್ಗೆ ನ್ಯೂರಾಲಿಂಕ್ ಸಂಸ್ಥೆ ಮಾಡಿದ ಅಧ್ಯಯನ ವರದಿಯನ್ನು ಅಮೆರಿಕ ಆಹಾರ ಮತ್ತು ಔಷಧ ಕಾರ್ಯಾಲಯಕ್ಕು ಸಲ್ಲಿಸಿ, ಮುಂದುವರಿದು ಮಾನವರ ಮೇಲೆ ಸಂಶೋಧನೆ ನಡೆಸಲು ಅನುಮತಿ ಕೋರಿದೆ.
ಎಲಾನ್ ಮಸ್ಕ್
ಈ ಹಿನ್ನಲೆಯಲ್ಲಿ ಮಾನವನ ಮೆದುಳಿಗೆ ಮೈಕ್ರೋಚಿಪ್ ಅಳವಡಿಸುವ ಅಧ್ಯಯನಕ್ಕೆ ಅಮೆರಿಕ ಸರ್ಕಾರ ಅನುಮತಿ ನೀಡಿದೆ. ಈ ಅನುಮೋದನೆಗಾಗಿ ನ್ಯೂರಾಲಿಂಕ್ ಸಂಸ್ಥೆಯು ಈ ಹಿಂದೆ ಹಲವು ಬಾರಿ ಅಮೆರಿಕ ಸರ್ಕಾರಕ್ಕೆ ಅರ್ಜಿ ಸಲ್ಲಿಸಿತ್ತು; ಆದರೆ, ಅವುಗಳನ್ನು ನಿರಾಕರಿಸುತ್ತಲೇ ಬಂದ ಅಮೆರಿಕ ಇದೀಗ ಅನುಮೋದನೆಯನ್ನು ನೀಡಿದೆ.
ಈ ನಿಟ್ಟಿನಲ್ಲಿ, ನ್ಯೂರಾಲಿಂಕ್ ತನ್ನ ಟ್ವಿಟರ್ ಪುಟದಲ್ಲಿ, “ನಮ್ಮ ತಂತ್ರಜ್ಞಾನವು ಒಂದು ದಿನ ಅನೇಕ ಜನರಿಗೆ ಹೇಗೆ ಸಹಾಯ ಮಾಡುತ್ತದೆ ಎಂಬುದರ ಕಡೆಗೆ ಇದು ಪ್ರಮುಖ ಮೊದಲ ಹೆಜ್ಜೆಯಾಗಿದೆ” ಎಂದು ಹೇಳಿದೆ. ನ್ಯೂರಾಲಿಂಕ್ ತಂಡವು ಮಾಡಿದ ನಿರ್ಣಾಯಕ ಕೆಲಸದಿಂದಾಗಿ ಅಮೆರಿಕ ಆಹಾರ ಮತ್ತು ಔಷಧ ಆಡಳಿತವು ಈ ಅನುಮೋದನೆಯನ್ನು ನೀಡಿದೆ” ಎಂದು ಅಮೆರಿಕ ಹೇಳಿಕೊಂಡಿದೆ.
ಬ್ಲೂಟೂತ್ ಮೂಲಕ ಮೆದುಳಿನಿಂದ ಎಲೆಕ್ಟ್ರಾನಿಕ್ ಸಾಧನಗಳಿಗೆ ಮಾಹಿತಿಯನ್ನು ಕಳುಹಿಸುವ ಪ್ರಯೋಗದಲ್ಲಿ ಭಾಗವಹಿಸುವವರ ದಾಖಲಾತಿ ಕುರಿತು ಹೆಚ್ಚಿನ ಮಾಹಿತಿಯನ್ನು ಶೀಘ್ರದಲ್ಲೇ ನೀಡುವುದಾಗಿ ಕಂಪನಿ ಹೇಳಿದೆ. ನ್ಯೂರಾಲಿಂಕ್ ಕೆಲವು ತಿಂಗಳುಗಳಲ್ಲಿ ಪ್ರಯೋಗವನ್ನು ಪ್ರಾರಂಭಿಸಲು ಸಿದ್ಧವಾಗಿದೆ.
Elon Musk Ncuralink Human Brain America Government
