ಉಜ್ಬೇಕಿಸ್ತಾನದಲ್ಲಿ 18 ಮಕ್ಕಳ ಸಾವಿಗೆ ಕಾರಣವಾದ ಭಾರತೀಯ ಕೆಮ್ಮು ಔಷಧಿಗಳ ಬಳಕೆಗೆ ವಿಶ್ವ ಆರೋಗ್ಯ ಸಂಸ್ಥೆ ವಿರೋಧ!
ಉತ್ತರ ಪ್ರದೇಶದ ನೋಯ್ಡಾ ಮೂಲದ ಮೆರಿಯನ್ ಬಯೋಟೆಕ್ ಕಂಪನಿಯು ತಯಾರಿಸಿದ ಕೆಮ್ಮಿನ ಔಷಧಿ ‘ಡಾಕ್-1 ಮ್ಯಾಕ್ಸ್’ ಸೇವನೆಯಿಂದ ಉಜ್ಬೇಕಿಸ್ತಾನ್‌ನಲ್ಲಿ 18 ಮಕ್ಕಳು ಸಾವನ್ನಪ್ಪಿದ್ದಾರೆ ಎಂದು ಅಲ್ಲಿನ ಆರೋಗ್ಯ ಸಚಿವಾಲಯವು ಆರೋಪವನ್ನು ಮಾಡಿದೆ. ಅಲ್ಲದೆ, ಈ ಔಷಧದಲ್ಲಿ ಎಥಿಲೀನ್ ಗ್ಲೈಕಾಲ್ ಎಂಬ ರಾಸಾಯನಿಕ ಅಂಶ ಇರುವುದನ್ನು ಪರೀಕ್ಷೆಗೊಳಪಡಿಸಿದ ಸಂದರ್ಭದಲ್ಲಿ ದೃಢಪಟ್ಟಿದೆ ಎಂದು ಸಚಿವಾಲಯವು ಆರೋಪ ಮಾಡಿದೆ.
ಇದರ ಬೆನ್ನಲ್ಲೇ ವಿಶ್ವ ಆರೋಗ್ಯ ಸಂಸ್ಥೆಯ ಸಂಶೋಧನಾ ತಂಡವು ‘ಮರಿಯನ್ ಬಯೋಟೆಕ್’ ತಯಾರಿಸಿದ ‘ಡಾಕ್-1 ಮ್ಯಾಕ್ಸ್’ ಮತ್ತು ‘ಆಂಬ್ರೊನಾಲ್’ ಎಂಬ ಎರಡು ಕೆಮ್ಮು ಔಷಧಿಗಳನ್ನು ಅಧ್ಯಯನ ಮಾಡಿ, ‘ಕೆಮ್ಮಿನ ಎರಡೂ ಔಷಧಿಗಳಲ್ಲಿ ಅಧಿಕ ಪ್ರಮಾಣದ ಎಥಿಲೀನ್ ಗ್ಲೈಕಾಲ್ ರಾಸಾಯನಿಕ ಅಂಶವಿರುವುದರಿಂದ ಎರಡೂ ಔಷಧಗಳು ಮಕ್ಕಳ ಬಳಕೆಗೆ ಯೋಗ್ಯವಾಗಿಲ್ಲ ಎಂಬುದು ದೃಢಪಟ್ಟಿದೆ’ ಎಂದು ಪ್ರಕಟಿಸಿದೆ.
ಈಗಾಗಲೇ ಕಳೆದ ಅಕ್ಟೋಬರ್‌ನಲ್ಲಿ ಪಶ್ಚಿಮ ಆಫ್ರಿಕಾದ ಗ್ಯಾಂಬಿಯಾದಲ್ಲಿ 66 ಮಕ್ಕಳು ಅನಾರೋಗ್ಯದಿಂದ ಸಾವನ್ನಪ್ಪಿದ್ದಾರೆ. ಹರಿಯಾಣದ ಸೋನಿಪತ್‌ನಲ್ಲಿರುವ ಮೇಡನ್ ಫಾರ್ಮಾಸ್ಯುಟಿಕಲ್ಸ್‌ ನಲ್ಲಿ ಅನುಮಾನಾಸ್ಪದವಾಗಿ ತಯಾರಿಸಲಾದ ನಾಲ್ಕು ಕೆಮ್ಮಿನ ಔಷಧಿಗಳು ಇದಕ್ಕೆ ಕಾರಣವಾಗಿರಬಹುದೆಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ಎಚ್ಚರಿಸಿದೆ.
ಭಾರತದಲ್ಲಿ ತಯಾರಿಸುವ ಕೆಮ್ಮು ಔಷಧಿಗಳನ್ನು ಬಳಸುವುದನ್ನು ನಿಲ್ಲಿಸುವಂತೆ ಸಂಸ್ಥೆಯು ವಿಶ್ವವನ್ನು ಕೇಳಿಕೊಂಡಿದೆ. ಈ ಘಟನೆಯಿಂದ ಜಾಗತಿಕವಾಗಿ ಭಾರತೀಯ ಔಷಧಗಳ ಖ್ಯಾತಿಯ ಮೇಲೆ ನಕಾರಾತ್ಮಕವಾದ ಪರಿಣಾಮವನ್ನು ಬೀರಿರುತ್ತದೆ.
