ಡೈನಾಮಿಕ್ ಲೀಡರ್ ನ್ಯೂಸ್, Dynamic Leader - Kannada Online News Portal 24x7 | Latest News in Kannada online | ಕನ್ನಡ ಸುದ್ದಿ
ಸೀಮಾನ್ Archives » Dynamic Leader
October 23, 2024
Home Posts tagged ಸೀಮಾನ್
ದೇಶ

ಡಿ.ಸಿ.ಪ್ರಕಾಶ್

ತಮಿಳುನಾಡಿನಲ್ಲಿ ‘ಚಂಡಾಲ’ ಎಂಬ ಜಾತಿ ಹೆಸರನ್ನು ಬಳಸಬಾರದು ಎಂದು  ತಮಿಳುನಾಡು ರಾಜ್ಯ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ಆಯೋಗ ರಾಜ್ಯ ಸರ್ಕಾರಕ್ಕೆ ಶಿಫಾರಸು ಮಾಡಿದೆ.

ವಿಕ್ರವಾಂಡಿ ಉಪಚುನಾವಣೆ ವೇಳೆ ‘ನಾಮ್ ತಮಿಳರ್’ ಪಕ್ಷದ ಸಾಟ್ಟೈ ದುರೈಮುರುಗನ್ (Sattai Durai Murugan), ಮಾಜಿ ಮುಖ್ಯಮಂತ್ರಿ ಕರುಣಾನಿಧಿ ಬಗ್ಗೆ ವಿವಾದಾತ್ಮಕ ಹಾಡನ್ನು ಹಾಡುವ ಮೂಲಕ ಪ್ರಚಾರ ನಡೆಸಿದ್ದರು. ಆ ಹಾಡಿನಲ್ಲಿ ಕಾಣಿಸಿಕೊಂಡ ‘ಚಂಡಾಲ’ (Sandalar) ಪದವು ಅಸ್ಪೃಶ್ಯರನ್ನು ಉಲ್ಲೇಖಿಸಲು ಬಳಸಲಾಗುತ್ತದೆ. ಈ ಪದವನ್ನು ಬಳಸಿದ್ದಕ್ಕಾಗಿ ಸಾಟ್ಟೈ ದುರೈಮುರುಗನ್ ವಿರುದ್ಧ ಎಸ್‌ಸಿ, ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಿ ಬಂಧಿಸಲಾಗಿತ್ತು.

ಇದಕ್ಕೆ ಸಂಬಂಧಿಸಿದ ಪ್ರಶ್ನೆಗಳಿಗೆ ಉತ್ತರಿಸಿದ ‘ನಾಮ್ ತಮಿಳರ್’ ಪಕ್ಷದ ಸಂಯೋಜಕ ಸೀಮಾನ್ (Seeman), “ಚಂಡಾಲ ಎಂಬ ಪದವು ಚಲನಚಿತ್ರ ಹಾಡುಗಳಲ್ಲಿ ಕಂಡುಬರುತ್ತದೆ. ಮಾಜಿ ಮುಖ್ಯಮಂತ್ರಿ ಕರುಣಾನಿಧಿ ಅವರು ಕೂಡಾ ಈ ಪದವನ್ನು ಹೆಚ್ಚಾಗಿ ಬಳಸಿದ್ದಾರೆ. ಎಐಎಡಿಎಂಕೆ ಪಕ್ಷದ ಹಾಡನ್ನು ಹಾಡಿದ ಸಾಟ್ಟೈ ದುರೈಮುರುಗನ್ ವಿರುದ್ಧ ಬಂಧನ ಕ್ರಮ ಕೈಗೊಂಡವರು, ಎಐಎಡಿಎಂಕೆ ವಿರುದ್ಧ ಏಕೆ ಕ್ರಮ ಕೈಗೊಳ್ಳಲಿಲ್ಲ? ‘ಚಂಡಾಲ’ ಎಂಬ ಸಮುದಾಯವಿದೆ ಎಂದು ನನಗೆ ತಿಳಿದಿರಲಿಲ್ಲ.

ನಾನು ಇದನ್ನು ಹಾಡು ಭಾಷೆಯಾಗಿ ಮಾತನಾಡಿದ್ದೆ. ಈ ಪದವು ಸ್ಕಂದ ಷಷ್ಠಿ ಕವಚದಲ್ಲಿರುವುದರಿಂದ ಇದನ್ನು ಬರೆದವರ ವಿರುದ್ಧವೂ ಎಸ್‌ಸಿ, ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲು ಸಾಧ್ಯವೇ?” ಎಂದು ಪ್ರಶ್ನಿಸಿದ್ದಾರೆ. ಈ ಸಮಸ್ಯೆಯನ್ನು ಕೊನೆಗೊಳಿಸಲು, ತಮಿಳುನಾಡು ರಾಜ್ಯ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ಆಯೋಗ ‘ಚಂಡಾಲ’ ಎಂಬ ಜಾತಿ ಹೆಸರನ್ನು ಬಳಸದಂತೆ ಸಲಹೆ ನೀಡಿದೆ.

ಈ ಕುರಿತು ಪ್ರಕಟವಾಗಿರುವ ಪತ್ರಿಕಾ ಪ್ರಕಟಣೆಯಲ್ಲಿ, “ಮಾನವನ ಉಳಿವಿಗೆ ಅಗತ್ಯವಾದ ಮೂಲಭೂತ ವಸ್ತುಗಳನ್ನು ಉತ್ಪಾದಿಸುವುದು ಮತ್ತು ಶವಗಳನ್ನು ಹೂಳುವುದು ಮುಂತಾದ ಸಮಾಜಮುಖಿ ಕೆಲಸಗಳನ್ನು ಮಾಡುತ್ತಿರುವ ಸಮಾಜದ ಬಾಂಧವರನ್ನು ಅವಹೇಳನಕಾರಿ ಹೆಸರುಗಳಿಂದ ಕರೆಯುವುದು, ರಾಜಕೀಯ ವೇದಿಕೆಗಳನ್ನು ಬಳಸಿಕೊಂಡು ಇತರರನ್ನು ದೂಷಿಸುವುದು, ಕಲಾ ಸಾಹಿತ್ಯದಲ್ಲೂ, ಚಲನಚಿತ್ರ ಹಾಸ್ಯ ದೃಶ್ಯಗಳು ಮತ್ತು ಹಾಡುಗಳಲ್ಲಿ ಕೂಡ ಜಾತಿಯ ಅಡ್ಡಹೆಸರುಗಳನ್ನು ಬಳಕೆ ಮಾಡುವುದು ವ್ಯಾಪಕವಾಗಿ ಹರಡಿವೆ.

ಇದು ಆ ಹೆಸರುಗಳಲ್ಲಿರುವ ಜನರನ್ನು ಹಾಗೂ ಅವರಂತಹವರಿಗೆ ನೋವುಂಟು ಮಾಡುವ ಕೃತ್ಯವಾಗಿದೆ. ಇದು ಕಾನೂನಿನ ಪ್ರಕಾರ ಶಿಕ್ಷಾರ್ಹ ಅಪರಾಧ ಎಂಬ ಕಲ್ಪನೆ ಸಾಮಾನ್ಯ ಸಮಾಜಕ್ಕೆ ಇಲ್ಲ. ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ ದೌರ್ಜನ್ಯ ತಡೆ ಕಾಯ್ದೆ, 1989ರ ಪ್ರಕಾರ, ಸಾರ್ವಜನಿಕವಾಗಿ ಪರಿಶಿಷ್ಟ ಜಾತಿಯ ಹೆಸರನ್ನು ಅವಹೇಳನಕಾರಿಯಾಗಿ ಬಳಸುವುದು ಶಿಕ್ಷಾರ್ಹ ಅಪರಾಧವಾಗಿದೆ. ತಮಿಳುನಾಡಿನ ಕೆಲವು ಭಾಗಗಳಲ್ಲಿ ಮತ್ತು ಭಾರತದಲ್ಲಿ ‘ಚಂಡಾಲ’ ಎಂಬ ಹೆಸರಿನ ಜನರಿದ್ದಾರೆ.

ಇದು ತಮಿಳುನಾಡಿನ ಪರಿಶಿಷ್ಟ ಜಾತಿಗಳ ಪಟ್ಟಿಯಲ್ಲಿ 48ನೇ ಸ್ಥಾನದಲ್ಲಿದೆ. ಇತ್ತೀಚೆಗೆ ಈ ಹೆಸರನ್ನು ಸಾರ್ವಜನಿಕವಾಗಿ ಇತರರನ್ನು ಅವಹೇಳನ ಮಾಡಲು ಬಳಸಲಾಗುತ್ತಿದೆ. ಆದ್ದರಿಂದ ಇನ್ನು ಮುಂದೆ ‘ಚಂಡಾಲ’ ಎಂಬ ಪದವನ್ನು ಬಳಸಬಾರದು ಎಂದು ತಮಿಳುನಾಡು ರಾಜ್ಯ ಪರಿಶಿಷ್ಟ ಜಾತಿ ಮತ್ತು ಬುಡಕಟ್ಟು ಜನಾಂಗಗಳ ಆಯೋಗ ಸಲಹೆ ನೀಡಿದೆ. ಉಲ್ಲಂಘನೆಯಾದಲ್ಲಿ ದೌರ್ಜನ್ಯ ತಡೆ ಕಾಯ್ದೆ 1989ರ ಅಡಿಯಲ್ಲಿ ಪ್ರಕರಣ ದಾಖಲಿಸುವಂತೆ ರಾಜ್ಯ ಸರ್ಕಾರಕ್ಕೆ ಶಿಫಾರಸು ಮಾಡಿದೆ.

ದೇಶ

ಚೆನ್ನೈ: “ಹಲವು ಭಾಷೆಗಳಿದ್ದರೆ ಮಾತ್ರ ಭಾರತ ಒಂದು ದೇಶವಾಗಿರುತ್ತದೆ. ಒಂದೇ ಭಾಷೆಯನ್ನು ಹೇರಿದರೆ ಹಲವು ದೇಶಗಳು ಹುಟ್ಟುತ್ತವೆ. ಅದನ್ನು ತಡೆಯುವ ಶಕ್ತಿ ಯಾರಿಗೂ ಇಲ್ಲ.” ಎಂದು “ನಾಮ್ ತಮಿಳರ್” ಪಕ್ಷದ ನಾಯಕ ಸೀಮಾನ್ ಹೇಳಿದ್ದಾರೆ.

ಚೆನ್ನೈ ಹೈಕೋರ್ಟ್‌ನಲ್ಲಿ ತಮಿಳನ್ನು ವ್ಯಾಜ್ಯ ಭಾಷೆಯನ್ನಾಗಿ ಮಾಡಬೇಕು ಎಂದು ಒತ್ತಾಯಿಸಿ, ಚೆನ್ನೈನ ಎಗ್ಮೋರ್‌ನಲ್ಲಿ ನಡೆಯುತ್ತಿರುವ ಉಪವಾಸ ಸತ್ಯಾಗ್ರಹದಲ್ಲಿ ಭಾಗವಹಿಸಿ ಸೀಮಾನ್ ಮಾತನಾಡಿದರು.

ಅವರವರ ನೆಲದಲ್ಲಿ, ಅವರವರ ಮಾತೃಭಾಷೆಯಲ್ಲಿ ಮಾತನಾಡುವ ಮತ್ತು ಅದನ್ನು ಪೂಜಿಸುವ ಹಕ್ಕು ಅವರಿಗಿದೆ. ಅದಕ್ಕಾಗಿಯೇ ಭಾಷಾವಾರು ರಾಜ್ಯಗಳನ್ನು ರಚಿಸಲಾಯಿತು. ಈ ಬಗ್ಗೆ ಮಾತನಾಡಿದರೆ ಪ್ರತ್ಯೇಕತಾವಾದದ ಬಗ್ಗೆ ಮಾತನಾಡುತ್ತಿದ್ದೀರಿ ಎನ್ನುತ್ತಾರೆ.

ಈಗ, ನಾನು ಹೇಳುತ್ತೇನೆ. ಹಲವು ಭಾಷೆಗಳಿದ್ದರೆ ಮಾತ್ರ ಭಾರತ ಒಂದೇ ದೇಶವಾಗಿರುತ್ತದೆ. ಒಂದೇ ಭಾಷೆ ಎಂದು ಹೇರಿದರೆ ಹಲವು ದೇಶಗಳು ಹುಟ್ಟುತ್ತವೆ. ಅದನ್ನು ತಡೆಯುವ ಶಕ್ತಿ ಯಾರಿಗೂ ಇಲ್ಲ. ಇದನ್ನು ಅಧಿಕಾರದಲ್ಲಿರುವವರು ಪರಿಗಣನೆಗೆ ತೆಗೆದುಕೊಳ್ಳಬೇಕು.

ನಾವು ವಿಭಜನೆಯ ಬಗ್ಗೆ ಮಾತನಾಡುತ್ತಿದ್ದೇವೆ ಎಂದು ಹೇಳಿದರೆ; ಅದನ್ನು ಮಾತನಾಡಲು ಪ್ರಚೋಧಿಸುವವರು ಅಧಿಕಾರದ ಚುಕ್ಕಾಣಿಯಲ್ಲಿ ಕುಳಿತಿರುವವರೇ. ಈ ರೀತಿಯ ಹೋರಾಟ ಪ್ರತಿ ವರ್ಷವೂ ನಡೆಯುತ್ತದೆ. ಅಧಿಕಾರೇತರರಿಗೆ ಹೋರಾಟವೊಂದೇ ದಾರಿ. ಅಧಿಕಾರದಲ್ಲಿರುವವರು ಅದನ್ನು ಜಾರಿಗೆ ತರಬೇಕು.

ಡಿಎಂಕೆ 18 ವರ್ಷಗಳ ಕಾಲ ಅಧಿಕಾರದಲ್ಲಿತ್ತು. ಪ್ರತಿಭಾ ಪಾಟೀಲ್ ಮತ್ತು ಪ್ರಣಬ್ ಮುಖರ್ಜಿ ಅವರನ್ನು ರಾಷ್ಟ್ರಪತಿಗಳನ್ನಾಗಿ ಆಯ್ಕೆ ಮಾಡಿತು. ಇಬ್ಬರೂ ಸಹಿ ಹಾಕಿದ್ದರೆ ತಮಿಳಿನಲ್ಲಿ ವ್ಯಾಜ್ಯ ಕಾಯ್ದೆ ಬರುತ್ತಿತ್ತು. ಅಬ್ದುಲ್ ಕಲಾಂ ಅವರ ಬಳಿ ಮನವಿ ಮಾಡಿದ್ದರೆ ಅವರೂ ಸಹ ಸಹಿ ಹಾಕುತ್ತಿದ್ದರು. ಆದರೆ ಸಮಸ್ಯೆ ಮುಗಿಯಬಾರದು ಎಂದು ಭಾವಿಸುತ್ತಾರೆ. ಹೋರಾಟಗಾರನಿಗಿಂತ ಹೋರಾಡಲು ಪ್ರಚೋದಿಸುವವನು ಅಪಾಯಕಾರಿ.

ಅಧಿಕಾರ ಬಹಳ ಬಲಿಷ್ಟವಾದದ್ದು; ಅದನ್ನು ಸಾಧಿಸಿದರೆ ಎಲ್ಲವೂ ಸುಲಭ. ಬೇಕಾದ, ಬಯಸಿದ ಇಲಾಖೆಗಳನ್ನು ಪಡೆದು ಅಧಿಕಾರ ಅನುಭವಿಸಿದವರು ಇಂತಹ ಬೇಡಿಕೆಯನ್ನು ಈಡೇರಿಸಲಿಲ್ಲ ಎಂದು ಕಿಡಿಕಾರಿದರು.