ಮುಸ್ಲಿಮರು ಯಾರಿಗೂ ಗುಲಾಮರಲ್ಲ; ಮಿತಿ ಮೀರಿದಾಗ ಸುಮ್ಮನಿರಲು ಆಗದು!

ಭೋಪಾಲ್: ಉತ್ತರಪ್ರದೇಶ ರಾಜ್ಯದ ಮಾಜಿ ಗವರ್ನರ್ ಮತ್ತು ಕಾಂಗ್ರೆಸ್ ಹಿರಿಯ ನಾಯಕ ಅಜೀಜ್ ಖುರೇಷಿ ಅವರು, ‘ಮುಸ್ಲಿಮರು ಯಾರಿಗೂ ಗುಲಾಮರಲ್ಲ; ಮಿತಿ ಮೀರಿದಾಗ ಸುಮ್ಮನಿರಲು ಆಗದು. ದೇಶಾದ್ಯಂತ 22 ಕೋಟಿ ಮುಸ್ಲಿಮರಿದ್ದಾರೆ. ಅದರಲ್ಲಿ ಒಂದೆರಡು ಕೋಟಿ ಜನ ಸತ್ತರೂ ಸಮಸ್ಯೆ ಇಲ್ಲ’ ಎಂದು ಹೇಳಿದ್ದಾರೆ. ಇದು ವಿವಾದಕ್ಕೀಡಾಗಿದೆ.

ಹಿರಿಯ ಕಾಂಗ್ರೆಸ್ ನಾಯಕರಾದ ಅಜೀಜ್ ಖುರೇಷಿ, 2014ರಲ್ಲಿ ಉತ್ತರ ಪ್ರದೇಶ, ಉತ್ತರಾಖಂಡ ಮತ್ತು ಮಿಜೋರಾಂ ರಾಜ್ಯಗಳ ರಾಜ್ಯಪಾಲರಾಗಿ ಸೇವೆ ಸಲ್ಲಿಸಿದ್ದರು. ಇತ್ತೀಚೆಗೆ ಅವರು ಮಧ್ಯಪ್ರದೇಶದ ವಿದಿಶಾ ಜಿಲ್ಲೆಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಅವರು ಅಲ್ಲಿ ಮಾತನಾಡುತ್ತಾ, ‘ಮುಸ್ಲಿಮರು ಯಾರಿಗೂ ಗುಲಾಮರಲ್ಲ; ಸ್ವಲ್ಪ ಮಟ್ಟಿಗೆ ಮಾತ್ರ ಸಹಿಸಿಕೊಳ್ಳಬಹುದು.

ನೀವು ನಮ್ಮ ಮನೆ ಮತ್ತು ಅಂಗಡಿಗಳನ್ನು ಸುಡಬಹುದು, ತಾಯಂದಿರನ್ನು ಅಪಮಾನಿಸಬಹುದು, ಅವರ ಮಕ್ಕಳನ್ನು ಅನಾಥರನ್ನಾಗಿ ಮಾಡಬಹುದು, ನಮ್ಮ ಸಹೋದರಿಯರ ಕೈ ಬಳೆಗಳನ್ನು ಒಡೆಯಬಹುದು ನಾವು ಮಿತಿಯವರೆಗೆ ಮಾತ್ರ ಸಹಿಸಿಕೊಳ್ಳುತ್ತೇವೆ. ನಾವು ಮಿತಿ ಮೀರುವಾಗ ಸುಮ್ಮನಿರುವುದಿಲ್ಲ. ದೇಶಾದ್ಯಂತ 22 ಕೋಟಿ ಮುಸ್ಲಿಮರಿದ್ದಾರೆ. ಅದರಲ್ಲಿ ಒಂದೆರಡು ಕೋಟಿ ಜನ ಸತ್ತರೂ ತೊಂದರೆಯಿಲ್ಲ.

ಇಂದು ಕಾಂಗ್ರೆಸ್ ಪಕ್ಷದ ಕೆಲವರು ಹಿಂದುತ್ವ, ಧಾರ್ಮಿಕ ಪ್ರವಾಸ, ಜೈ ಗಂಗಾ, ಜೈ ನರ್ಮದಾ ಎಂದು ಮಾತನಾಡುತ್ತಾರೆ. ಇದು ನಾಚಿಕೆಗೇಡಿನ ಸಂಗತಿ. ಇದಕ್ಕಾಗಿ ಪಕ್ಷದಿಂದ ತೆಗೆದು ಹಾಕಿದರೂ ಚಿಂತೆಯಿಲ್ಲ. ಮುಸ್ಲಿಮರು ನಿಮ್ಮ ಗುಲಾಮರಲ್ಲ ಎಂಬುದನ್ನು ಕಾಂಗ್ರೆಸ್ ಸೇರಿದಂತೆ ದೇಶದ ಎಲ್ಲಾ ರಾಜಕೀಯ ಪಕ್ಷಗಳು ಅರ್ಥಮಾಡಿಕೊಳ್ಳಬೇಕು’ ಎಂದು ಮಾತನಾಡಿದ್ದಾರೆ. ಇದು ಈಗ ವಿವಾದಕ್ಕೆ ಎಡೆಮಾಡಿಕೊಟ್ಟಿದೆ.