ಲಿಂಗವನ್ನು ಕಂಡುಹಿಡಿಯಲು 8 ತಿಂಗಳ ಗರ್ಭಿಣಿಯ ಹೊಟ್ಟೆಯನ್ನು ಕತ್ತರಿಸಿದ ಗಂಡನಿಗೆ ಜೀವಾವಧಿ ಶಿಕ್ಷೆ!
ಉತ್ತರಪ್ರದೇಶದಲ್ಲಿ ಆಘಾತಕಾರಿ ಘಟನೆಯೊಂದರಲ್ಲಿ, ಹುಟ್ಟಲಿರುವ ಮಗುವಿನ ಲಿಂಗವನ್ನು ಕಂಡುಹಿಡಿಯಲು ತನ್ನ ಗರ್ಭಿಣಿ ಹೆಂಡತಿಯ ಹೊಟ್ಟೆಯನ್ನು ಕುಡಗೋಲಿನಿಂದ ಕತ್ತರಿಸಿದ ಪತಿಗೆ ಜೀವಾವಧಿ ಶಿಕ್ಷೆ ವಿಧಿಸಲಾಗಿದೆ.
ಈ ಭಯಾನಕ ಘಟನೆ 2020ರ ಸೆಪ್ಟೆಂಬರ್ 19 ರಂದು ಬದೌನ್ ಪ್ರದೇಶದಲ್ಲಿ ನಡೆದಿದೆ. ಇದರಲ್ಲಿ ಸಂತ್ರಸ್ತೆಯ ಹೆಸರು ಅನಿತಾ, ಹಲ್ಲೆಮಾಡಿದ ಗಂಡನ ಹೆಸರು ಪನ್ನಾ ಲಾಲ್. ಘಟನೆ ನಡೆದಾಗ ಅನಿತಾ ಎಂಟು ತಿಂಗಳ ಗರ್ಭಿಣಿಯಾಗಿದ್ದಳು. ಅಲ್ಲದೆ, ಆ ಸಮಯದಲ್ಲಿ ಇಬ್ಬರಿಗೂ ಐದು ಹೆಣ್ಣು ಮಕ್ಕಳಿದ್ದರು.
ಆದರೆ ಪನ್ನಾ ಲಾಲ್ ಆಗಾಗ ಪತ್ನಿಯೊಂದಿಗೆ ಹುಟ್ಟುವ ಮಗು ಗಂಡಾಗಿರಬೇಕು ಎಂದು ಜಗಳವಾಡುತ್ತಿದ್ದರು. ಗಂಡು ಮಗುವಾಗದಿದ್ದರೆ ಅನಿತಾಗೆ ವಿಚ್ಛೇದನ ನೀಡಿ ಬೇರೆ ಮಹಿಳೆಯನ್ನು ಮದುವೆಯಾಗುವುದಾಗಿ ಅನಿತಾ ಮನೆಯವರಿಗೆ ಬೆದರಿಕೆ ಹಾಕಿದ್ದ. ಇಂತಹ ವಾತಾವರಣದಲ್ಲಿ, ಸ್ಥಳೀಯ ಅರ್ಚಕರೊಬ್ಬರು, ಅನಿತಾ ಅವರಿಗೆ ಆರನೇ ಮಗು ಕೂಡ ಹೆಣ್ಣು ಮಗುವೇ ಎಂದು ಹೇಳಿದ್ದನ್ನು ನಂಬಿದ್ದ ಪನ್ನಾ ಲಾಲ್ ಪತ್ನಿಯೊಂದಿಗೆ ಜಗಳವಾಡುತ್ತಿದ್ದರು.
ಒಂದು ಹಂತದಲ್ಲಿ, ಅನಿತಾ ಹೊಟ್ಟೆಯನ್ನು ಹರಿದು ಒಳಗಿರುವ ಮಗುವಿನ ಲಿಂಗ ಪತ್ತೆ ಮಾಡುವುದಾಗಿ ಪನ್ನಾ ಲಾಲ್ ಬೆದರಿಕೆ ಹಾಕಿದ್ದರು. ಇದರಿಂದ ಆಘಾತಕ್ಕೊಳಗಾದ ಅನಿತಾ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ ಪನ್ನಾ ಲಾಲ್ ಕುಡುಗೋಲಿನಿಂದ ಆಕೆಯ ಹೊಟ್ಟೆಯನ್ನು ಕೊಯ್ದಿದ್ದಾರೆ. ಈ ವಿಷಯ ತಿಳಿದ ಅನಿತಾ ಸಹೋದರ ಘಟನಾ ಸ್ಥಳಕ್ಕೆ ಬರುವ ಹೊತ್ತಿಗೆ ಪನ್ನಾ ಲಾಲ್ ಅಲ್ಲಿಂದ ಪರಾರಿಯಾಗಿದ್ದರು. ನಂತರ ಪೊಲೀಸರು ಕೂಡಲೇ ಅನಿತಾಳನ್ನು ರಕ್ಷಿಸಿ ದೆಹಲಿಯ ಸಪ್ತರ್ಜಂಗ್ ಆಸ್ಪತ್ರೆಗೆ ದಾಖಲಿಸಿ ರಕ್ಷಿಸಿದರು. ಆದರೆ ಆಕೆಯ ಹೊಟ್ಟೆಯಲ್ಲಿದ್ದ ಗಂಡು ಮಗು ದಾರುಣವಾಗಿ ಸಾವನ್ನಪ್ಪಿತು.
ಅದರ ನಂತರ, ಪನ್ನಾ ಲಾಲ್ ವಿರುದ್ಧ ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 307 (ಕೊಲೆ ಯತ್ನ) ಮತ್ತು 313 (ಮಹಿಳೆಯ ಒಪ್ಪಿಗೆಯಿಲ್ಲದೆ ಗರ್ಭಪಾತಕ್ಕೆ ಕಾರಣವಾಗುವುದು) ಅಡಿಯಲ್ಲಿ ಪ್ರಕರಣ ದಾಖಲಿಸಿ ಜೈಲಿಗೆ ಕಳುಹಿಸಲಾಯಿತು. ಬಳಿಕ ಅನಿತಾ ಕೂಡ ತನಗೆ ನಡೆದ ದೌರ್ಜನ್ಯದ ಬಗ್ಗೆ ನ್ಯಾಯಾಲಯದ ಮುಂದೆ ಹೇಳಿಕೊಂಡಳು.
ಆಗಲೂ ಪನ್ನಾ ಲಾಲ್, ಅನಿತಾ ತನ್ನ ಸಹೋದರರೊಂದಿಗೆ ಆಸ್ತಿ ವಿವಾದದಲ್ಲಿದ್ದ ಕಾರಣ ಸುಳ್ಳು ಪ್ರಕರಣ ದಾಖಲಿಸಲು ತನ್ನನ್ನು ಗಾಯಗೊಳಿಸಿಕೊಂಡಿದ್ದಾಳೆ ಎಂದು ನ್ಯಾಯಾಲಯಕ್ಕೆ ತಿಳಿಸಿದರು. ಇದನ್ನು ಒಪ್ಪದ ಹೆಚ್ಚುವರಿ ಜಿಲ್ಲಾ ಮತ್ತು ಸೆಷನ್ಸ್ ನ್ಯಾಯಾಧೀಶ ಸೌರಭ್ ಸಕ್ಸೇನಾ ಅವರು ಪನ್ನಾ ಲಾಲ್‌ಗೆ ಜೀವಾವಧಿ ಶಿಕ್ಷೆ ವಿಧಿಸಿದ್ದಾರೆ.
