ಹಮಾಸ್‌ನ ಹಿರಿಯ ಅಧಿಕಾರಿ ಅಲಿ ಬರಾಕಾ ಮಾತನಾಡಿ, ಸೋವಿಯತ್ ರಷ್ಯಾದಂತೆ ಅಮೆರಿಕವೂ ಮುಂದೊಂದು ದಿನ ಕುಸಿಯಲಿದೆ. ಇಸ್ರೇಲ್-ಹಮಾಸ್ ಯುದ್ಧದಲ್ಲಿ ಅಮೆರಿಕ ಇಸ್ರೇಲ್ ಅನ್ನು ಬೆಂಬಲಿಸುತ್ತಿದೆ. ಇದರಿಂದ ಪ್ಯಾಲೆಸ್ತೀನ್ ನಲ್ಲಿ ಇಸ್ರೇಲ್ ಸೇನೆ ಕ್ರೂರ ದಾಳಿ ನಡೆಸುತ್ತಿದೆ.

ಈ ಹಿನ್ನಲೆಯಲ್ಲಿ, ಹಮಾಸ್ ಸಂಘಟನೆಯ ಹಿರಿಯ ಅಧಿಕಾರಿ ಅಲಿ ಬರಾಕಾ ಯೂಟ್ಯೂಬ್ ಚಾನೆಲ್ ಗೆ ನೀಡಿದ ಸಂದರ್ಶನದಲ್ಲಿ, ‘ಸೋವಿಯತ್ ರಷ್ಯಾದಂತೆ ಅಮೆರಿಕ ಒಡೆಯುತ್ತದೆ. ಅಮೆರಿಕದ ಶತ್ರು ರಾಷ್ಟ್ರಗಳೆಲ್ಲ ಒಂದಾಗಲು ಸಮಾಲೋಚನೆ ನಡೆಸಲಾಗುತ್ತಿದೆ. ಅವರೆಲ್ಲರೂ ಒಟ್ಟಾಗಿ ಯುದ್ಧಕ್ಕೆ ಮುಂದಾದರೆ ಅಮೆರಿಕಕ್ಕೆ ಭಾರಿ ನಷ್ಟವಾಗುತ್ತದೆ.

ಅಮೇರಿಕ ಪ್ರಬಲ ರಾಷ್ಟ್ರವಾಗಿ ಇರುವುದಿಲ್ಲ. ಅಮೆರಿಕದ ಮೇಲೆ ದಾಳಿ ಮಾಡಿದ್ದಕ್ಕಾಗಿ ನಾನು ಉತ್ತರ ಕೊರಿಯಾವನ್ನು ಶ್ಲಾಘಿಸುತ್ತೇನೆ. ಅಮೆರಿಕದ ಮೇಲೆ ದಾಳಿ ಮಾಡುವ ವಿಶ್ವದ ಏಕೈಕ ವ್ಯಕ್ತಿ ಎಂದರೆ ಅದು ಉತ್ತರ ಕೊರಿಯಾದ ನಾಯಕ ಮಾತ್ರ. ಅಮೆರಿಕ ಮೇಲೆ ದಾಳಿ ಮಾಡುವ ಸಾಮರ್ಥ್ಯವನ್ನು ಉತ್ತರ ಕೊರಿಯಾ ಹೊಂದಿರುವುದರಿಂದ, ಉತ್ತರ ಕೊರಿಯಾ ಕೂಡ ನಮ್ಮ ಮೈತ್ರಿಗೆ ಸೇರಬಹುದು.

ಹಮಾಸ್ ನಿಯೋಗ ಇತ್ತೀಚೆಗೆ ರಷ್ಯಾದ ಮಾಸ್ಕೋಗೆ ಭೇಟಿ ನೀಡಿತ್ತು; ಅದೇ ರೀತಿ ಚೀನಾಕ್ಕೆ ಹೋಗುತ್ತದೆ. ಇರಾನ್‌ಗೆ ಅಮೆರಿಕದ ಮೇಲೆ ದಾಳಿ ಮಾಡುವ ಸಾಮರ್ಥ್ಯ ಇಲ್ಲ. ಈ ಯುದ್ಧದಲ್ಲಿ ಇರಾನ್ ಮಧ್ಯಪ್ರವೇಶಿಸಿದರೆ, ಅದು ಜಿಯೋನಿಸ್ಟ್ ಸಂಘಟನೆ ಮತ್ತು ಅಮೆರಿಕದ ನೆಲೆಗಳ ಮೇಲೆ ದಾಳಿ ಮಾಡುತ್ತದೆ. ಆದರೆ ಇರಾನ್ ಬಳಿ ಸಾಕಷ್ಟು ಶಸ್ತ್ರಾಸ್ತ್ರಗಳಿಲ್ಲ.’ ಎಂದು ಹೇಳಿದರು.